демилитарландыру

(Демилитаризация; лат. де…, militaris — әскери)

қарусыздандыру. Халықаралық құқықта мемлекеттер арасындағы келісім бойынша белгілі бір аумақта, мемлекетте қарулы күштер ұстауға, әскер орналастыруға, соғыс базаларын орнатуға тыйым салу. Екінші дүниежүзілік соғыста антигитлерлік коалиция елдерінің жеңісі нәтижесінде 1945 ж. Подтсдам конференциясында КСРО, Ұлыбритания, Франция және АҚШ әскерлерінің Германияны басып алуының негізгі мақсаттарының бірі — оны толық демилитарландыру, қарулы күштерді қарусыздандыру және тарату, Бас штабты, барлық әскери оқу орындарын жабу, қандай да бір әскери дайындыққа және әскери үгіт-насихатқа тыйым салу; қару-жарақтың барлық түрлерін жою және оларды жасауға тыйым салу болып белгіленді. Дәл сондай шаралар 1945 ж. Жапония жөнінде белгіленді. Батыс мемлекеттер (АҚШ, Англия, Франция) бұл шешімдерді орындамады. КСРО-ның қатысуынсыз олар Федеративтік Германия Республикасында милитаризмнің өршуіне және оның батыс мемлекеттердің әскери топтарына қосылуына бағытталған шешімдер қабылдады. Сондай-ақ Жапонияны милитарландыруға қатысты белгілі бір топтардың іс-әрекеттері күшейді.